شهيد

ف الصميم/شهيد

يا بلدي مات لي شهيد........ميت بيتبسم
قاللي يا خويا نصيب......ع الكل متقسم
اوعا يا خويا تسيب...........بلدنا تتقسم
يا بلدي مات لي شهيد.........ميت بيتبسم
... كان حر دمو حر.....مكنش راضي الذل
دمو خفيف اصلو.........مكنش داق المر
قاللي بلدنا امانه...........قلبوها لبضاعه
منين متودي وشك.........الارض متباعه
مصانعنا متباعه
كرامتنا متباعه
والكل ليه ساكت ...يا بلدي فين حقي
حراميا نهابا ...بمزاجها بتنقي
وشعبنا غلابا...نفسو يكونلو رغيف
حلالهم اللقما...هدما ولبس نضيف
وسقف يحميهم من صهد حر الصيف
سكت وراح قايل..م اليوم دا مش ساكت
للغايب الحاضر واللي مهوش سامع
انا ع الميدان رايح...رايح ومش راجع
معدش فيها سكوت
يانا حر يحسن اموت
ضربو علينا النار راح قالي متخافشي
دا ف الميدان احرار متخافش ولا تمشي
ضربو علينا النار..... ظباط وقناصه
ضربو علينا النار..صابو اخويا برصاصه
قاللي ..بلدنا امانه..خلوها ف عنيكم
حلم كأنو بعيد....دلوقت ف اديكم
شهد الشهادة وسكت...وهو متبسم
هو نصيبو يموت ...ونصيبنا ...نتقسم
ليبرالي...اسلامي . .علماني و...يساري...قبطي..مع المسلم
هتسيبو دم الشهيد ...يروح هدر يا ناس
هتسيبو دم الشهيد...خلاص مفيش احساس
طول م الفساد موجود...طول م الضعيف يتداس
يا بلدي ماتلي شهيد ...ميت بيتبسم

م/ احمد البهي